Anita's world of writing

ನಾಚಿಕೆಯೇ ನಡೆಯಾಗಿ ನಡೆದಿತ್ತು ಆತನರಮನೆಗೆ/ ಸಡಗರವೇ ನಡುವಾಗಿ ಮಿಡಿದಿತ್ತು ಆತನೆಡೆಗೆ/ ಅವಮಾನ ಅನುಮಾನ ಅಡಿಮುಡಿಯ ಸುಟ್ಟಿತ್ತು/ ಮರಣಿಸಿದ ಮನದ ಜೊತೆ ಮರೆತಿರುವ ಹುಟ್ಟಿತ್ತು / ಹಿಂದಡಿಯ ಅಚ್ಚಿನಲ್ಲಿ ಮುಂದಡಿಯ ಮರೆತ ಶಾಪ/ ಆತನಿಗದು ವರವು ನಿಜ ಅವ ಅವನಿಯ ಅಧಿಪ/ ನಿಟ್ಟುಸಿರು ಬರಸಿಡಿಲು ಜೊತೆಗೆ ಪಯಣ/ ಉಸಿರೊಂದೆ ಮಿಸುಕಾಡಿ ಹಾಡಿ ತನನ// ಮಿದು ಕಂದ ಭರತನ ಅಳುವನ್ನು ಲೆಕ್ಕಿಸಲಿಲ್ಲ/  ಹುಲಿ ಮರಿಗಳ ಮಧ್ಯೆ ಬಿಟ್ಟಾಗಲು ಮಿಸುಕಲಿಲ್ಲ /  ಪರಚುಗಾಯದಿ ರಕ್ತ ಒಸರಿದಾಗಲೂ ಉಸುರಲಿಲ್ಲ / ಕಾನು ನೀನೊಂಟಿ  ಎಂದು ಕಿಸಿದರೂ ಕುಸಿಯಲಿಲ್ಲ / ಮಲ್ಲಿಗೆಯರಳು ಮೊಟಕಿ ಮಿಡುಕಿದರೂ ದಣಿಯಲಿಲ್ಲ / ಭರತ ಭಟನಾಗಿ ಹುಲಿಯಾಗಿ ಗುಟುರು ಹಾಕುವವರೆಗೆ/  ಶಕುಂತಲೆ ಮೌನಿ .. ಮಹಾ ಮೌನಿ ಮತ್ತೆ ಅಳಲಿಲ್ಲ/ ಪ್ರೇಮಿ ದುಶ್ಯಂತನ ಆಲಿಂಗನಕೂ ಆಕೆ ಮತ್ತೆ ನಗಲಿಲ್ಲ//                                   ಅನಿತಾ ಶೆಟ್ಟಿ ಮೂಡುಬಿದ್ರೆ